يا رب صبرني على أمرك وبلواك =واجبر عزا من شاف ضيم العزاير
مثل الدريك اللي على حوض الإدراك =يبكي ودمعه فوق الاوجان جاير
يا عين هلي ذارف الدمع سفاك=وابكي وهاتي ما خفا من عباير
يا عين لا تبكين هذا و لا ذاك=إلا ولا فرقا الأهل و العشاير
ابكي على سمح النبأ حسن الأسلاك=اللي عليه مغوزر الدمع فاير
قلبي عليه من الولع فيه دكاك=والحال مني خلصت بالحساير
كني ربيط الروم في وسط شياك=وإلا كسير موجعته الجباير
قدم العرب غادي بشوش وضحاك=والكبد يصلاها لهيب السعاير
يا لله يا والي تصاريف الأفلاك=يا مطفي نار السنين العساير
يا من لعسرات الشرابيك فكاك=رب السماء والي جميع البصاير
سبة عزاي وصار للروح ملاك=و أرخصت له عمري و ما بالذخاير
يا زين روحي يا أريش العين تفداك =حيثك هواي وعن هوى الغير ذاير
علي نذر أن ولف الله لاماك =لا أرز رايات الفرح و البشاير
و أصوم لله ما تيسر لعيناك=وابني لحبك بالضماير مناير
يا زين يا عذب اللما كيف أبنساك=والحب سلطانه على الحال جاير
يا مورد الخدين محلا سجاياك=يا سيد لكل المترفات النضاير
يا زين شفني من غرامك وفرقاك=كني على جال من الجم هاير
يا أبو محمد يا فتى الجود بنخاك =يا فرحت المضيوم يوم الكساير
شف لي طبيب شاطر لا عدمناك=كوده يداوي علة بالضماير
وإلا فنا يا معدن الجود وإياك=نركب على ثنتين عوص حراير
يومين والثالث على الهون ملفاك=هجر منازل من له القلب طاير
فالي لفينا ديرة الربع ذولاك=فالوصل يطفي مالجا من زفاير
أمسي وكني مالك كل الأملاك=أملاك سلطان الهجر و الجزاير
فالي لفينا دافع الله مناياك=مرخوص يا مروي السيوف الشطاير
عند السياسب لابة مثل شرواك=الكل منهم يحتمل للخساير
يا أبو محمد عانك الله وعافاك=و أذراك ربي من حتوف الدواير